ភ្នំពេញ៖ ក្រសួងសុខាភិបាលព្រមានចាត់វិធានការផ្លូវច្បាប់ចំពោះម្ចាស់គណនីហ្វេសប៊ុក LIZA SHOP សម្រស់និងសុខភាពនិងជនពាក់ព័ន្ឋដទៃទៀតដែលកំពុងផ្សព្វផ្សាយលក់ឱសថ Digest Gold ទៅតាមច្បាប់ស្តីពីច្បាប់វិសោធនកម្មច្បាប់ស្តីពីការគ្រប់គ្រងឱសថជាធរមាន។

យោងតាមការពិនិត្យនៅលើបណ្ដាញសង្គមហ្វេសប៊ុកដែលមានគណនីឈ្មោះ LIZA SHOP សម្រស់និងសុខភាព កំពុងផ្សព្វផ្សាយលក់ឱសថ Digest Gold គ្មានលេខទិដ្ឋាការឬបញ្ចិកា និងគ្មានច្បាប់អនុញ្ញាតឲ្យផ្សព្វផ្សាយពីក្រសួងសុខាភិបាលគិតត្រឹមថ្ងៃទី២៤ ខែមករា ឆ្នាំ២០២២។

អនុលោមតាមច្បាប់ស្តីពីការគ្រប់គ្រងឱសថ និងច្បាប់ស្តីពីវិសោធនកម្មច្បាប់ស្តីពីការ គ្រប់គ្រងឱសថតម្រូវឱ្យរាល់ការចរាចរឱសថ ឬផលិតផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទក្នុងព្រះរាជាណាចក្រកម្ពុជា ត្រូវមានលេខទិដ្ឋាការ ឬបញ្ចិកាពីក្រសួងសុខាភិបាល ហើយរាល់ការផ្សព្វផ្សាយផលិតផលទាំងនេះត្រូវមានការអនុញ្ញាតពីក្រសួងសុខាភិបាល។

ក្រសួងសុខាភិបាលប្រាប់ពលរដ្ឋឱ្យបញ្ឈប់ការប្រើប្រាស់ឱសថគ្មានលេខទិដ្ឋាការ ឬបញ្ចិកាខាងលើជាបន្តទៀត ដើម្បីជៀសវាងការខាតបង់ប្រាក់កាសនិងប៉ះពាល់ដល់សុខភាពអ្នកប្រើប្រាស់ ព្រោះផលិតផលនេះគ្មានប្រភពច្បាស់លាស់ ដែលមិនអាចធានាបាននូវគុណភាព និងសុវត្ថិភាពបានឡើយ៕